ధరిత్రీ -క్షమా దాత్రీ

ధరిత్రీ -క్షమా దాత్రీ ( నేడు పర్యావరణ దినోత్సవం )

కన్నబిడ్డలపై ఎంత కనికరమమ్మా
నీ వంటినిండా చెత్త చెదారాలు నింపుతున్నా
నీశరీరం లో రసాయనాలు నింపుతున్నా
నీ స్తన్య సమానమైన నదీజలాలు కలుషితం చేస్తున్నా
నీ పచ్చదనాల ఆభరణాలు చెట్లను నాశనం చేస్తున్నా
నీ రోమ్ములనే పర్వతాలను చిదిమి చిద్రం చేస్తున్నా
చూస్తూ ఎలా భరిస్తున్నావు తల్లీ ?
క్షమయా ధరిత్రీ అన్నారు గానీ ఇంత క్షమ అవసరమా ?
నీక్షమా గుణాన్ని అలుసుగా తీసుకుంటున్నారు
కూర్చున్న కొమ్మనే నరుక్కుంటున్నారు
నువ్వు కన్నెర్రచేస్తే భూకంపాలు ,ప్రళయాలు వస్తాయని తెలుసు
ఐనా మానవాళికి నీ విలువ తెలియకుంది ముప్పు పొంచి వుంది
మరొక్కసారి క్షమించు తల్లీ ! కళ్ళు తెరుచుకునేలా చెయ్యి

కలగానే

చల్లగ ఏదోభావన నా ఎద తాకినది
మెల్లగ నామదినే మేల్కొలిపినది
కల్లకపట మెరుగని నిను కలిపినది
కలల లోకమున నను తిప్పినది
మల్లెల పరిమళమే వ్యాపించినది
మధురిమ నామదిలో కలిగినది
కోకిల రాగం కొత్తగ మారినది
ఝుంటి తేనియ జాలువారినది
కంటి కాటుక కొన చెరిగినది
రాతిరి ఊసులు నాకే తెలిపినది
కమ్మని నిదురే మరి కరిగినది
కాలం ఎంతగ నిను మార్చినది
కలగానే నా కల మిగిలినది

పచ్చదనం

పచ్చదనం పంచుకోర

ఆయుష్షును పెంచుకోర

పదితరాలకు వెలుగు బాట

పరిసరాలు పరిశుభ్రం

పశు పక్షులు మరి పదిలం

మేలుకొనగ మేలైన సమయము

కనులు తెరవకుంటే దరిలోనే నరకము

చెట్టు చేమలేకపోతే నీరు లేదు గాలి లేదు

నీరు లేక గాలి లేక నీవే లేవు

ఒక్క మొక్కనాటి చూడు

ఆత్మ తృప్తి పొంది చూడు

నేడు నీకు ఫలము లేకపోవు

భావి తరాలకు మేలు కూర్చు

స్వార్ధాన్ని విడనాడు స్వర్గాన్ని పొంది చూడు

ఏక వాక్యాలు –ఏకతారాలు -6

149.ఒద్దికగా కూర్చుంటావు- ముద్దిమ్మంటే ఒద్దంటూ
150.మనసంతా మౌనభాష్యాలే -మరో ప్రేమకావ్యాన్ని ఆవిష్కరిస్తూ

151.కళ్ళల్లో నీళ్ళు -మమకారం ఇంత కారమని తెలియదు
152.వేసవి తాపంపెరుగుతోంది -మనమధ్య దూరంలా
153.నా దాహం పెరుగుతోంది-నీ ప్రేమ మరీచికల వెంట పరిగెడుతుంటే
154.కాలం కరిగిపోతోంది-నాకౌగిలిలో నీలా

155.కోయిలమ్మలకు కొదవలేదు -కొత్తరాగాలే కొరవడ్డాయి
156.కోయిలమ్మకు జ్వరమొచ్చింది -కాలుష్యపు మావిచిగురుతిని
157.కాకులకు వేడుక -కోయిలమ్మ మూగబోయిందని
158 .రాజకీయం నేర్చింది పంచాగం -ఎవరికి నచ్చినట్లు వారికిచెపుతూ
159.ఉగాది పచ్చడి -ఎలాగోచేసుకుతిన్నాము చచ్చి చెడి
160.కోయిలమ్మకు కులుకు -తన గొంతులో తెనేలోలుకుతాయని

161.మన్మధుడు ముస్తాబవుతున్నాడు -మనందరినీ అలరించడానికి
162.మదిలో ఎదో అలజడి -మన్మధ ఆగమనానికి నందిగా
163.నిశా కాంత నిషా నిండినకళ్ళతో -ఉషాకాంత వెలుగు వాకిళ్ళలో

164.కన్నెల కలలు తీరుతాయి -వచ్చింది మన్మధ కదా
165.అన్నీ నీ పడకగదులే -గుండెలో నాల్గు గదులున్నాయి
166.కనులు నిండిన నీరూపం -రెప్పవాల్చలేకపోతున్నా
167.నిత్యం నీరూరుతూ -చెలమల లాంటి నీకళ్ళు
168.కలలు కరిగిపోతున్నాయి -కన్నీటికి అర్ధం చెపుతూ

169 చేదు కనబడదెందుకనో - .అనుభూతుల షడ్రుచులలో

170.వేప జాతికి ద్రోహం -.ఉగాది నెపంతో
171.సిగ్గు వదిలి విచ్చుకుంటున్నాయి -ముడుచుకున్న మల్లెలు
172 .సన్నజాజులు కుళ్ళుకుంటున్నాయి -సన్నని నీనడుము చూసి
173.తాకుతూనే వుండిపోతారలా -ఈ సబ్బు రుద్దుకోవాలంటే సిగ్గేస్తోంది బాబూ

174.మన ఏక్ తారలు -సీతారాముల ముత్యాలతలంబ్రాలుగా

175.స్త్రీని చెరపట్టినా నీతితప్పలేదు -రావణుడు రాక్షసుడే
176.దేవుళ్ళనీ విడదీసారు విభజన పేరుతో -మనుషులనే కాదు
177.హృదయం ఖాలీఅయిపోయింది -నీకైప్రేమంతా ఒలకపోసా
178.భళ్లు మన్న శబ్దం -పగిలింది గ్లాసుకాదు నాహృదయం

179.రాజధాని అమరావతి అట -ఇం (చం) ద్రు ని కొలువులో ఇక రంభా ఊర్వశులే
180.మూగనై పోయా -నువ్వే మాట్లాడేస్తుంటే
181.ఏక తారలంటూనే -శత సహస్ర తారా శర ధారలు
182.అరుంధతి -వసిష్టుని పక్కన ఏక్ తార
183.హిమాలయంకరుగుతుంది - నీహృదయంలా కాదు
184.ఆనందాన్ని పంచుతూనే వుంటుంది మృదంగం -రెండుచెంపలూ వాయిస్తున్నా
185.పేదల సమాధులపై పునాదులు-నవరాజ్య నిర్మాణానికి
186.పరీక్షలకాలం -అమ్మానాన్నలకి
187.లోతుతో పనేముంటుంది -ఈత వచ్చినవాడికి
188.తల ఎత్తకుండా తలపై గంగ -శివుడికి సిగ్గనుకుంటోంది పార్వతి

189.చంద్రుని సరసన రోజూ ఒక్కతారే -మనకి మాత్రం రోజూ పంచ ఏక్ తారలు
190.నింగి నిండా నక్షత్రాలే -చంద్రుని నఖ క్షతాల్లా
191.చల్లని వెన్నెల పంచుతాడు -వొళ్ళంతా మండించు కుంటూ
192.పున్నమినాడు మురిపిస్తూ -అమాసకు ముఖం చాటేస్తాడు
193.సవతి పోరు ఎక్కువే -తారా మణులకు !

194.నా గుండె లయతప్పుతోంది -నీ అడుగులసవ్వడులకే

195 మొగ్గలా విచ్చుకుంటావు -కనపడని ముళ్ళు గుచ్చుతూ
196.ఎంతకాలమిలా - ఒకరికి ఒకరం దూరంగా
197 దారిచూపిన దేవతవు- .దారితెలియని నాకు
198. తెరచాపవు నీవే -సుడిగుండాల నడిసంద్రంలో
199.అమ్మ -సృష్టి కర్త బ్రహ్మకు ప్రతిరూపం

200.అమ్మ అమ్మే -కోటీశ్వరుడికైనా కూటికి లేని వాడికైనా



201.అనాధలనుకన్నది అమ్మే -తాను అన్యాయమైపోతూ
202.ఆడదానికి వరం -అమ్మగా మారగలగడం
203.అమ్మతనానికి దూరంకాకు -అనుచితంగా ప్రవర్తించి
204.ఎడారిలో మొక్కల్లా బట్టతలపై జుట్టు -అంతేనా నీభావన
205.హాస్య తారలాట రాయమని కితకితలు పెట్టేస్తూ -ఏమిటీ తమాషా
206.మాటల్లేవ్ మాట్లాడుకోడాల్లేవ్ తారలు రాసెయ్యడమే -అంతే అనుకున్నా
207.మాయ చేయకలా -అమాయకమైన నా మనసుని
208.కలలుకంటాయి -నిదుర రాని కనులు కూడా
209.కవ్విస్తుంటాయి- వాలుచూపు వాలుజడ వీలున్నప్పుడల్లా

ఏక వాక్యాలు –ఏకతారాలు -5

101.అమ్మ ఒడి ఒక్కటే -అలసిన మనసును సేదతీర్చేది
102.ఆ రాధను అడిగా -నిను ఆరాధించేదెలా అని
103.పడతి మోములో పరవశం -పతిదేవుని సమాగమం లో
104..ఇంకా ముద్దొస్తోంది -అలసిన నీమోము
105.అలలు ఆరాటపడుతున్నాయి –పడిలేవడానికి
106.విరబూసిన పువ్వుకు తెలుసు -వాడిపోనున్నతన జీవితం

107 .నాకు మరణం లేదు-గొంతు నిండా ప్రేమామృతమే
108..నీ తలపులే -నావలపు తలుపులు
109..నీ ఓరచూపుతెలిపింది -ఓణీలు వేసే వయసొచ్చిందని
110.ఎంతదూరమైనా ఎదురీదుతా –నీప్రేమప్రవాహంలో

111.మారాకు వేసింది కొమ్మ -నీమనసులో కొత్త ఊహల్ల్లా
112.మన సరాగాలు -మానస రాగాలు
113.ఆనంద పారవశ్యంలో నేను -ఆరునొక్కరాగంతో నీవు
114.అగరుధూపం గదినిండా -ఆత్మీయ భావం మదినిండా
115.అలకెందుకో అలుక -భూమాత అక్కునచేర్చుకోలేదనేమో

116.మరులుగొలుపుతూ -మల్లెలువిరబూస్తున్నాయి
117.మాధుర్యం నీ మాటల్లో-మధువులూరుతున్న పెదవులతో
118.మధువును గ్రోలేది ఒక్కటే-పువ్వుచుట్టూ భ్రమరాలెన్ని తిరిగినా
119.మంజీరనాదాలు మ్రోగుతున్నాయి -మంగళకర సమయంలో
120.మానసచోరుడే -మరో కాంతను వశపరచుకున్నాడు

121.అమ్మని,ఆలిని గౌరవించు -వేదికలెక్కి ఉపన్యాసాలక్కరలేదు
122.అమ్మచనుబాలే ఆడతనం -ఆత్రంగా వెతకక్కరలేదు
123.చనిపోయాకే దినాలు -ఇంకా ఆడది బతికుంది
124 అంబరాన్నే గెలిచింది -అలుపెరుగని పోరాటంచేస్తూ 7Mar 15
125.మగువల దినోత్సవం -మగవారి అద్యక్షతన
126.మహిళా రక్షణ చట్టం -అడుగడుగునా రాక్షసఘట్టం
127.విషపు గుటకలు మింగుతున్నా -పెదవులపై చిరునవ్వు తనస్వంతం
128.వేటగాళ్ళే తనచుట్టూ -బెదురుచూపులతో అలసిన లేడికూన
129.మనసెప్పుడూ పవిత్రమే -నీనామ స్మరణతో 7Mar 15
130.కట్టినబట్ట కాదు -అర్ధనగ్నంగా నీమనసు
131.సభల్లో స్త్రీ సన్మానం -నడిరోడ్డుపై దోపిడీ చేయబడ్డ మానం
132.స్త్రీ జనోద్దరణకు అత్తగారి ఉపన్యాసం-ఇంట్లో కోడలి నిత్య ఉపవాసం
133.కోడలు కలలుకంటోంది -అత్తగారిని ఎప్పుడవుతనా అని

134.నువ్వు ఎదుటేవున్నావు -నీ ఊపిరి తగులుతోంది నాకు
135.మరణిస్తామని తెలుసుగా-మమకారం వదల మెందుకని
136.మల్లెలు నవ్వుకుంటున్నాయి -నీ కొంటె చూపులకు మైమరుస్తూ
137.నువ్వు నేను మౌనం -మనిద్దరిదీ ఒకటే ప్రాణం
138.ప్రతిక్షణం నీ జపం -పరీక్షించడం ఎందుకు పరవసించక
139. నింగి నేల తాకే చోటు -చుమ్బించిన అధరాల తీరు
140.పచ్చా పచ్చని పైరు -పల్లెమ్మ చుట్టిన కోకతీరు
141.జలజల పారే సెలయేరు -జవ్వని నవ్వుల తీరు

142.ఆరాధిస్తూనే ఉంటానిన్ను -అలా కళ్ళల్లోకి చూస్తూ
143.కోయిలకొత్తగా కూస్తోంది -మావిచిగురు మత్తులో
144.జవనాశ్వం లా నువ్వు ఆశలున్నా జవసత్వాలు ఉడిగి నేను
145.మెత్తగా గుచ్చుకుంటూ -కొత్త ఆశల పచ్చిక
146.నీ పెదవిపై చిరునవ్వు -తొలికిరణం తాకిన తుషారంలా
147.ఈ జన్మలోనూ నను వెంటాడుతూ నువ్వు -జన్మజన్మల బంధమేమో
148.పాట వై వస్తావు -పూటకో పల్లవితో పరవశింప చేయడానికి

ఏక వాక్యాలు –ఏకతారాలు -4

76 మనసులో ఏకాంతం తప్పదు- .మౌనం వీడనంతకాలం
77..మాట మారుస్తావు నువ్వు -నేను ఏమరుపాటుగా వుంటే

78.ఓటమి కూడా ఆనందంగానే వుంది -నీ తో ఓడిపోతున్నప్పుడల్లా

,79 .ఊరంతా వూహా గానాలే -నువ్వు నేను ఒకటయ్యామని

80 మొల్లలన్నీ విచ్చుకున్నాయి- ఎల్లలు లేని మన ప్రేమకు చిహ్నంలా

81.మదిలో ఎదో అలజడి -నీ సవ్వడి వింటూనే

82.మినుకు మినుకు మంటున్నానని తార కెంత గర్వమో
83..అలకే ఒక ఆభరణం -నీకులుకులు దాచుకోడానికి
84.సూర్యునితో పోటీ పడుతూ -పట్టపగలు వీధి దీపాలు
85.మౌనం రాజ్యమేలుతోంది -అమావాస్య చీకట్లో
86.ఒదిగిపోవడం మంచిది -ఓడిపోతామనుకున్నప్పుడు
87.ఓటమి నాచివరి మజిలీ -నీ ఒయారానికి తలవొగ్గి
88..ఒయారం వొలకబోస్తూ నువ్వు -జారిపడి ఓటమి అంచులలో నేను
89.ప్రేమమందిరం చివరిమజిలీ - ఓటమి ఎరుగని బహుదూరపు బాటసారికి
90చీపురు నడుంబిగించింది - సమాజంలో పెరిగిన చెత్త ఊడ్చ డానికి

91.ప్రేమ మైకంతో చదవలేక పోతున్నా - మన ప్రేమకావ్యాన్ని
92.కలలే కంటినిండా -అలలుఅలలుగా
93.ముద్దడిగా - ముగ్ధమనోహరంగా ముద్దమందారంలా వున్నావని
94.చిరుజల్లులా నీప్రేమ -ఐనా తడిసిముద్దవుతున్నాను



95.మూతి ముడుచుకోకలా -ముని మాపు వేళకు వస్తాగా
96..అందనంత ఎత్తులో నీవు -నిన్నల్లుకోవాలని నేను
97.ఆరాధన విలువెంతో -ఆ రాధకు తెలుసు
98. వేలెంటైన్ నంటాడు -వేలెడంత లేడు
99.అనుభవించాలని వుంది -ఆనందానుభూతిని
100.ఉన్నజ్ఞాపకాలు కొట్టుకు పోతాయి- జడివాన మాత్రం కురిపించకు

ఏక వాక్యాలు –ఏకతారాలు -3

51.మబ్బులన్నీ మాటువేసాయి -జాబిల్లి పై దాడిచేయడానికి
52.మనిషి మీద ఎంత ప్రేమో -రక్తంమరిగిన దోమ కి
53.మయూరానికి తెలుసు -కరిమబ్బులు కమ్ముకుంటాయని
54.రాత్రినిదురోయింది -సడి చేస్తే చంటోడు ఉలిక్కిపడతాడని

55..తగువెందుకు నీకు నాకూ -తూరుపు తెల్లారి పోతుంటే
56.ఎదురుచూసిన క్షణాన్నడుగు -నీకై ఎంత పరితపించానో
57.వణికి పోతోంది పాపం -ప్రేమ మంచులోతడిసిన మనసు
58.పూజకు పాత్రంకావాలని -పూసిన ప్రతి పువ్వూ
59..కొంటెగా చూస్తున్నా -కొంగుచాటు కృష్ణుడిలా

60.బండిలాగుతూనే వున్నా -బ్రతుకు జీవుడా అని
61.కాలి బూడిదై పోతున్నాయి కోరికలు-భోగి మంటల్లో పిడకల్లా
62.కొండెక్కి కూర్చుంటున్నాయి ధరలు -కొత్త అల్లుడి కోర్కేల్లా
63.దోసిలి పట్టా -నీనవ్వుల ముత్యాలు ఏరుకున్దామని
64.వాడిపోయాయి పూలన్నీ -నీనవ్వులు లేని నా జడలా

65..బృందావనం సిగ్గుతో ఎర్రబారింది-రాధామాధవుల ఊసులు వింటూ
66.చిత్తరువునైపోయాను-చిత్రంలోచెలి చేతులుచాచిరమ్మంటే
67. ఒక్కసారీ తిరిగిరావు-జన్మజన్మలబంధమైవుండిపోతానన్నా
68. చెలీచెలీ అంటున్నారు చలికివణుకుతున్నవారంతా
69 .ప్రేమసందేశాన్నిపంపా-శాంతిగీతమాలపిస్తూ
70. విశ్వ శాంతికోసమే- .ప్రేమ సందేశమైనా శాంతి సందేశమైనా
71.ముళ్ళు గుచ్చుకున్నా మనసునొచ్చుకున్నా -సందేశమే నా సంతోషం
72..చాచా కిష్టం -గులాబులన్నా శాంతి కపోతమన్నా
73.ఆకాశ మంతా విహరిస్తాయి -కోర్కెలే రెక్కల గుర్రాలయినప్పుడు
74..కొంటె కోర్కెలు నామదిలో -క్రొంగొత్త అందాలు నీలో విరిసినప్పుడు
75..కన్నీటిపొర నీ కళ్ళలో -తదేకంగా తమకంతో నా వైపు చూసినప్పుడు