ఉగాది

ఉగాది -మన తెలుగు మన సంస్కృతీ గ్రూపులో నన్ను విజేతనుచేసిన కవిత 

భావ కవుల కల్పనా కల్పవల్లీ 
ప్రకృతి రమణీయ శోభల కళామతల్లీ 
చిగురాకుపచ్చచీరను చుట్టి 
చిరునగవు లే చిగుళ్ళను అలముకొని 
కొమ్మలమాటున కోయిల కూజితాలతో 
వేపపూల పరిమళాల సోయగాలతో 
గున్నమామి వగరు మామిళ్ళ అందాలతో 
నీ నునులేత స్పర్సతో నవ యుగాదిని తోడ్కొని వచ్చి 
మానవునిలో దాగియున్నఅరిషడ్వర్గాలను
షడ్రుచుల మేళవింపుతో తొలగించి 
రంగు కన్న రాగమే మిన్నయను అనురాగ భావమును
కోయిల గానామృతము వినిపించి మా కనులు తెరిపించి 
తేటతెలుగు అమృతాల పంచాగ శ్రవణము గావించి
ఈ వత్సరమునకు మా రాశి ఫలితాలను తెల్ప
జయనామ సంవత్సరానివై జయము కూర్చ 
ఉషోదయాన మా హ్రుదయోదయము చేయవచ్చిన
వసంతయామినీ నీకిదే స్వాగతము సుస్వాగతము
శుభము శుభము !జయము జయము !!