నా శ్రీమతి కోసం

నా శ్రీమతి కోసం

 
సిరివెన్నెల జలతారు ముసుగులో 
మరుమల్లెల పరిమళాలు రువ్వుతూ 
మన్మధ బాణాలు నా ఎదలో గుచ్చుతూ 
నడయాడుతూ వచ్చిన రాగ మాలికా !

నీ కనుదోయిలో వెలిగే ప్రేమదీపాలు
నీ చిరు మోవిపై పలికే విరహ గీతాలు 
నను కవ్వించే సమ్మోహన సౌందర్యాలు 
నను మైమరపించే నీ కురుల అందాలు 

కనులు మూసినా తెరిచినా 
స్వప్న సుందరిలా 
నా కనుల ముందు నిలిచే నువ్వు 
నిర్మల ఝరి లా వినిపించే నీ నవ్వు 

నిను శిల్పంగా మలచేందుకు 
నీ హృదయం కరగని శిల కాదు 
నిను చిత్రంగా గీచేందుకు 
నువ్వు కరిగి పోయే రంగువి కావు 

అందుకే ప్రియా!

నా హృదయమనే కాన్వాసుపై 
మమతలనే రంగులు కలిపి 
ప్రేమ అనే కుంచెతో గీసిన
అపురూప చిత్రం నీవు !