ఆగమార్ధంతు

(కవితల సుమహారం-45 )

సాహితీ సేవ చిత్ర కవిత -11 పోటీ లో ద్వితీయ ఉత్తమకవిత

ఎందఱో భరతమాత ముద్దుబిడ్డల త్యాగఫలము
ఎర్రకోటపై ఎగురుతున్న మువ్వన్నెల పతాకం
మరిఎందరో మేధావుల ప్రసవ వేదనల
మేదోఫలము మన రాజ్యాంగం
రాజ్యాంగం పుట్టినరోజు మనకు పండుగరోజు
ప్రతి ఏటా జాతిని మమైకంచేసే వేడుకరోజు
పల్లెపట్టణం రాజధానినగరం సర్వాంగ సుందరం
రాష్ట్రాలనుండి శకటాల వయ్యారినడకలతో
దేశ రాజధాని కళకళలాడే వైనం
త్రివిధ దళాల వందన స్వీకరణతో
ఆకాశాన వైమానికి దళాల విన్యాసాలతో
రాష్ట్రపతి జాతికి ఇచ్చే సందేశంతో
ప్రజలంతా ఎంతో ఆనందానుభూతిని పొందుతుంటే
ముష్కర మూకలు జాతిసమైక్యతను సవాల్ చేస్తూ
విధ్వంసాలు సృష్టిస్తామని విర్రవీగుతుంటే
లౌకిక సామ్యవాద సర్వసత్తాక గణతంత్ర రాజ్యమై
ప్రపంచంలోనే అతి పెద్ద శాంతి కాముక దేశమై
పొరుగువాడి పగకు బలిఅవుతూ ఇంకెందరిని
ఈ క్షుద్ర కుటిల ఉగ్రవాదానికి బలిపెట్టుకుందాం ?
మన న్యాయసూత్రాల లొసుగులతో ఆడుకుంటూ
ఆర్ధిక రాజధానిలోనే తెగబడేందుకు సిద్ధమైతే
హడావిడి తనిఖీలతో చేతులుదులుపుకొంటూ
చేతులుకాలాక ఆకులుపట్టుకోవడం
ప్రజా రక్షణకన్నా ప్రజానాయకుల రక్షణే ధ్యేయంగా
రాజకీయనాయకులకు కొమ్ము కాయడం
ఇంకెక్కడ గణతంత్రం,అంతా ధనతంత్రం ,అందుకే
ఆగమార్ధంతు ప్రజా తంత్రం గమనార్ధంతు ఉగ్రవాదం
గణగణ గణగణ మోగాలి గణ తంత్రపు జేగంటలు