ఉపశమన తరంగాలు (కవితల సుమహారం-37 )
పుట్టెనొక ఆడబిడ్డ నాయింట
నట్టింట నడయాడు లక్ష్మిలా
అరచేత పెంచితి అల్లారుముద్దుగా
అక్షరాలుదిద్దించి మురిసినాను
చదువుల సరస్వతి నాబిడ్డయని
ఎదిగినంతనె తెలియవచ్చినది
ఆడ బ్రతుకెంత కష్టమో
అడుగుబయట పెట్ట,కోర చూపులతోడ
కబళించు తోడేళ్ళు,కాంక్షతో చూచెడు
క్రూర మృగాళ్ళు,ఎటులో దాటుకొనుచు
గండమ్ములు,ఈడు వచ్చెనని పెండ్లిచేయ
అత్త ఆడబడుచులే ఆమె పాలిటి
మృత్యుదేవతల అవతారమెత్త
ఎక్కడ "ఆడ" బ్రతుకు,నీడనైన
కబళించు వేటగాళ్ళు,ఆడ జాతికి
కీడు ఆడతనమే,అర్ధనగ్న దృశ్యాలతో
ఆడతనమును అంగటి పాలుచేయు
సినిమాల ప్రభావమ్ము,అత్తా కోడళ్ళ
ఎత్తుపై ఎత్తులతో కుయుక్తులతో
దూరదర్సన ధారావాహికల
ప్రసారాలు,విరగ గొట్టిన సమాచారాల
(బ్రేకింగ్ న్యూస్ )తో ఆడదాని మానభంగ
దృశ్యాల ప్రసారములుచేయు వార్తా చానెళ్ళు
ఇందరుకలసి ఆడదానిని హీన పరచుచుండ
ఎక్కడ 'యత్ర నార్యంతు పూజ్యతే "
కామెంట్‌లు లేవు:
కామెంట్‌ను పోస్ట్ చేయండి