రైతన్నా-ఓ రైతన్నా (కవితల సుమహారం-14)
పొద్దుగాలే నిదురలేచి చద్ది అన్నం మూట పట్టి
కాడి భుజాన ఎత్తి పట్టి దుక్కిదున్న పోయినావే
భూమిదున్ని దమ్ముచేసి విత్తుజల్లి
నింగితల్లి చినుకుతోన కనికరిస్తే
పుడమితల్లి పులకరించి మొలకలెత్తె విత్తులన్నీ
మొలకలన్నీ నారుచేసి నాట్లు వేసి
కలుపులోస్తే ఏరివేసి పురుగులోస్తే మందులేసి
అప్పుచేసి ఎరువువేసి ఏపుగానే పంటపెంచి
పోట్టపోసిన పంటచూసి కోతకోసే వేళకోసం ఎదురుచూస్తే
ఉరిముఉరిమి మెరుపుమెరిసే,నీగుండె లోన పిడుగు లేసె
కుండపోతగ వానలోస్తే చెరువుగట్టు కోత పడితే
నీబడుగు గుండెకు నొప్పిలేచే ,కంటనీరే కాల్వలాయే
ఉన్న పంటను కోతకోసి కుప్పనూర్చి అమ్మబోతే
రంగుమారిన గింజలని రంగుమార్చి
దళారిబాబు నాల్గురూకలు చేతబెడితే
అప్పులిచ్చిన అప్పులోడే దారిలోనా అడ్డుపడితే
ఆలుబిడ్డల కడుపు నింపే దారిలేక
అన్నదాతగ పేరుమోసి మింగ మెతుకే దిక్కులేక
దిక్కుతోచక దిగులుపడుతూ వుసురునీవుతీసుకొంటే
నీపీనుగు పైనే పైసలేరుక రాజకీయం చేస్తరందరు
భారతజాతికి అన్నమెట్టే రైతు దేవుడ
చేతులెత్తి మొక్కుతున్నా చావుమాటను ఎత్తబోకు
వెన్ను ముక్కే లేకపోతే జీవమున్నా చచ్చినట్టే
దేవుడొక్కడే తోడునీకు మంచిరోజులోస్తాయ్ ముందుముందు
నీబాగు కోసం దేవులందరికి మొక్కుతుం డా రైత న్నా- ఓ రైతన్నా( సాహితీసేవ చిత్ర కవితలపోటీ -6 కి కవిత టి.వి.ఎస్.ఆర్.కే.ఆచార్యులు
కామెంట్‌లు లేవు:
కామెంట్‌ను పోస్ట్ చేయండి