ప్రేమ -"విశ్వ" రూపం

(కవితల సుమహారం-52)

ప్రపంచాన్నిఆడించేది డబ్బు అంటారు అందరూ కానీ
ప్రపంచాన్ని నడిపించే మంత్రం మాత్రం ప్రేమ
రూపమేదైనా అపురూపమైనదేభావం
తల్లిగర్భంలో ప్రేమ అనే పేగుబంధం
లోకంలోకివచ్చాక తల్లి వొడి అనుబంధం
అమ్మ,నాన్న,అక్కా,అన్నా,చెల్లి
చుట్టూఉండే బంధాలు ప్రేమకు ప్రతిరూపాలు
నాది అనేభావమే ప్రేమకు పునాది
అది వస్తువైనా బంధమైనా,జీవరాసులైన
మనబడి పై ప్రేమ,మనగురువుపై ప్రేమ
చదువుపై ప్రేమ ,సాధించాలనుకున్న లక్ష్యం పై ప్రేమ
ఇవన్నీ ఒకెత్తైతే యవ్వనారంభంలో మొలక లెత్తే ప్రేమ
జీవనగమనాన్ని నిర్దేశించే చుక్కాని
ప్రేమలోమాధుర్యాన్ని గ్రోలవలసిందే కానీ
ఒక ప్రేమకోసం మరెన్నో ప్రేమలను త్యాగం చేయాలా
బంధాలకోసం మనసులో పుట్టిన ప్రేమను వదిలెయ్యాలా
ప్రేమ ఆకర్షణ కాకుంటే పుట్టిన ప్రేమకు మరణంలేదు
ప్రేమకు పరాకాష్ట పెళ్ళే కానఖ్కరలేదు
ప్రేమంటే రెండు శరీరాల వేడి చల్లార్చుకోడం కాదు
ప్రేమంటే ఎదుటివారి సుఖాన్ని కోరుకోవడం
వారి ఆనందాన్నిమనం అనుభవించడం
కానీ నేడు వెర్రితలలు వేస్తున్నప్రేమ
దానికి ఆజ్యంపోస్తున్న మాధ్యమాలు
మనిషిని మనిషిగా ప్రేమించాలనే భావంతో
విశ్వమానవ ప్రేమకు ఊపిరులూదాలి
చివరిగా అన్నిటినీ మించి మనందరికీ ఒక్కటే ప్రియమైనది
ఎవరుఅవునన్నాకాదన్న మన ప్రాణం పై ప్రేమ
ఎవరున్నాలేకున్నా ప్రాణం లేకుంటే ప్రేమేది?


సాహితీసేవ చిత్రకవితల పోటీ -13 "ప్రేమ"