మనబాల్యం(తీపి గుర్తులు)

మనబాల్యం(తీపి గుర్తులు)
మన తెలుగు మనసంస్కృతి చిత్రకవిత-64 మొదటి స్థానం పొందినకవిత
(కవితల సుమహారం-9)

ఎవరుచెప్పినా బాల్యం తీపిగుర్తే అందరికి
బుడిబుడి నడకల తో మొదలయ్యే పరుగుల ప్రవాహం
గలగలసెలయేరల్లె పారుతూ ఎగిరిదుమికే జలపాతం
అమ్మకొంగు పట్టుకొని ఆడినా పాడినా
నాన్నవేలు పట్టుకొని నిర్భయంగా నడిచినా
జో కొడుతుంటే గుండెలపై ఆదమరచి నిదరోయిన
మల్లెల లాంటిమనసులు మమతల ఉషస్సులు
ఆటేదైనా పాటేదైనా అరమరికలు లేని ఆనందం
ఆడామగా తేడాలెరుగక అమ్మా నాన్నాటలాడినా
భయానికి వెరవనివెర్రి కోర్కెల సాహసాలు
చెట్లెక్కినా కోతికొమ్మచ్చిలాడినా చిక్కే ఆహ్లాదం
చిన్నచిన్న అబద్ధాలు,చిలిపితగాదాలు
కాకెంగిళ్ళు,పచ్చిమామిడి ముక్కలపంపకాలు
ఎన్నని ,ఎన్నెన్నెనని ఈమధురానుభూతులు
కానీ నాణానికి మరోపార్స్వం అనాధలబాల్యం
అమ్మ ఆప్యాయతలకు నాన్న ఆదరణకు నోచుకోని
ఆటపాటల ఆహ్లాదాలు చిదిమేసిన జీవితాలు
మరోజన్మకే కాదు మరేజన్మకి వారికొద్దిలాంటి బాల్యం
అందరిలానే ఆనందానుభూతుల బాల్యం కావాలి వారికి
చేతనైతే వారికందిద్దాం బాల్యపు మధురస్వప్నాలు