చదువది ఎంతగల్గిన

సాహితీ సేవ చిత్ర కవితల పోటీ -12 లో 'నేటి విద్యార్ధి 'అంశంపై* చదువది ఎంతగల్గిన * " ఉత్తమ తృతీయ కవిత" .
_________________/\________
(కవితల సుమహారం-50)


అన్నప్రాసన నాడే ఆవకాయచందంలా
అ ఆ లబదులు ఏ,బి,సి,డి లు
వర్ణక్రమాలు తెలియకపోయినా వల్లెవేసే చదువు
పల్లెలలోసైతం ఇంగిలీసు చదువు
వాడిబరువు పదిహేనుకేజీలు మోసేది పాతిక
పొద్దున్నే చద్దన్నం మూటలా లంచ్ బాక్స్
పొద్దున్నేపోతే పోద్దోయాకే ఇంటికి
అస్సుబుస్సంటూ వస్తూనే హోమ్ వర్కులతో భేటీ
ఓ ఆటా లేదు పాటా లేదు నిత్యం సిలబస్సు లతో కుస్తీ
రేంకు లవేటలో అమ్మానాన్నా ఒకటే హడావిడి
వీధికో విద్యాలయం ఊరికో ఇంజనీరింగ్ కాలేజీ
ఏటేటా కుప్పలుతెప్పలుగా నిరుద్యోగుల ఉత్పత్తి
నేర్చేవిద్యలో ఎక్కడా కానరాదు క్రమశిక్షణ
సంస్కృతీ సాంప్రదాయాల విలువలూ హుళక్కి
గతకాలం చదువులలో జ్ఞానం ,విజ్ఞానం,విలువలు
ఇప్పుడు పూర్తిగా వొంటిమీద నిలబడని వలువలు
తెలుగు సంస్కృతం విలువలు లేని విషయాలు
మిగిలినవన్నీ విద్యార్థికి అర్ధంకాని వలయాలు
సెల్లు,బైకు,సినిమావ్యామొహం
చదువది ఎంతగల్గిన సమాజహితములేని చదువు
అర్ధ వ్యామోహముతో కూనారిల్లుతున్నచదువు
అందుకే పెద్దబాలశిక్షలుకావాలి మనం నేటితరానికి
పిల్లలచదువులే వారసత్వసంపద కావలి భావితరానికి.